1. Situaziun da partenza

Las pussaivladads per augmentar l'attractivitad e per accelerar il traject da la Viafier retica Cuira – Glion – Mustér – Sedrun duain vegnir examinadas pli detagliadamain. I sa tracta da concepir las colliaziuns si e giu da la Surselva da maniera pli svelta, pli frequenta ed uschia er pli attractiva.

Cun quest project vuless la Viafier retica examinar pli detagliadamain las pussaivladads da densifitgar la purschida e d'accelerar ils trens sin quests trajects. En quest connex sto vegnir verifitgada er la politica da fermada. Tras l'augment da l'attractivitad da questa lingia vegn spetgà particularmain er in rinforzament dal spazi economic da la Surselva, en spezial en il territori da Glion. 

2. Cuntegn dal project

• Mussar las consequenzas d'in eventual tact da mes'ura da las Viafiers federalas (arriv a Cuira) per l'urari en Surselva.
• Mussar scenaris da purschidas en il tact da mes'ura fin Glion e fin Mustér cun e senza mesiras d'acceleraziun sco er cun resguardar la politica da fermada. L'accent vegn mess sin il traject Cuira - Glion.
• Fixar las "stretgas" criticas infrastructuralas en quests scenaris sco er las mesiras d'acceleraziun infrastructuralas pussaivlas.
• Studi da project per "stretga" cun calcular ils custs approximativs (exactadad dals custs: +/- 50%).
• Stimar las consequenzas per in eventual augment da las frequenzas per scenari.
• Cumparegliar e valitar ils singuls scenaris (incl. calculaziun da rentabilitad approximativa).
• Mussar las consequenzas per l'economia publica dal spazi economic da la Surselva, en spezial da la regiun da Glion. Questas ponderaziuns ston vegnir mussadas per tut ils scenaris examinads.
• L'entir project sto vegnir preschentà en rapports intermediars ed en in rapport final.